Мысалы, жедел мақсаттағы взвод командирі аға лейтенант Равшан Розматов әскери тізбекті аралау кезінде жанып жатқан ғимараттардың бірінен ес-түссіз құлап жатқан 30-35 жас шамасындағы әйелді байқап қалды. Дереу қатардағы жауынгер Марат Қазимов екеуі әлгі әйелді қауіпсіз жерге алып шығып, оған әскери фельдшер прапорщик Жұлдыз Садықова алғашқы медициналық көмек көрсетті. Зардап шеккен әйел адам есін жиған соң, оның осы базарда сатушы болып жұмыс істейтін Әйгерім Ибраева екені анықталды.

Осы күні сағат 09.10 шамасында белгісіз 4 азамат бутиктердің біріне еніп, анасының тапсыруымен заттарды күзетіп тұрған 10-12 жас шамасындағы қыздың қарсылығына қарамастан, ондағы мүлікті ұрлауға әрекет жасап жатқанда сержант Нұрбек Мамбетұлы бастаған әскери жасақ көмекке келген. Шұғыл түрде әскери жасақ ұрлық жасамақ болғандардың екеуін қолға түсіріп, полиция қызметкерлеріне тапсырды. Ал, зардап шеккен Назгүл есімді қыз әскери фельдшер медициналық жәрдем көрсеткен соң, ата-анасына тапсырылды.

11 сағат 20 минутта «Құлагер» базарына кіре берісте 25-30 жас шамасындағы белгісіз азамат базар ішінен шыға сап, есінен танып құлайды. Оны қатардағы жауынгер Дәурен Естаев байқап қалып, командирі аға лейтенант Санат Кабишевке баяндап, взвод командирі лейтенант Сергей Бурчуковпен бірге жедел жәрдем көлігіне жеткізеді. Зардап шеккен азаматқа дер кезінде медициналық көмек көрсетілді.

Тілсіз жаумен күреске қатысқан барлық жауынгерлер Ішкі әскерлер  Бас қолбасшысының және «Оңтүстік» өңірлік қолбасшылығы қолбасшысының құқықтарымен көтермелеуге ұсынылды.

ҚР ІІМ Ішкі әскерлер баспасөз қызметі